Monday, February 16, 2009

تأجيل

تم تأجيل القضية إلى جلسة 15 مارس ، القضية كانت أمام مجلس الدولة الدائرة الثامنة ،وكانت رقم مسلسل 68 أى إنتظرنا 67 قضية قبلنا بس خلصوا بسرعة
الأستاذة هدى نصر الله المحامية من الشبكة العربية لمعلومات حقوق الإنسان كانت موجودة من حولى 9 صباحا
حضر محامي ممثلا لجامعة القاهرة وقرر القاضي التأجيل حتى الرد وحاجات كدة قانونية مش فهمتها


****

رئيس الجامعة ونائبه كانوا وعدوا بتسكينى بداية التيرم الثانى
ذهبت للمدينة الجامعيه وقابلت مديرها وقالى انهم بيسكنوا الان تقدير " جيد محول " واللى شايلين مواد من مناطق نائية "قلتله يا أستاذ عز أنا جايب جيد جدا فاستغرب جدا انى لسة مسكنتش لحد دلوقتى المهم قالى تجيب لى موافقة مكتوبة من نائب رئيس الجامعة فرحت لنائب رئيس الجامعة مديرة مكتبه مرضيتش تدخلنى له وقالت لى اكتب طلب قلتلها انا كتبت طلبات كتير قبل كدة قالت لى لازم تكتب طلب وأعرضه على نائب رئيس الجامعة

فذهبت للدكتورة ليلى عميدة كلية الاعلام كانت قالت لى هابقى أتوسط لك فى بداية التيرم الثانى فرحت لقيت الكلية فيها مؤتمر لمدة ثلاثة أيام وطبعا العميدة مش هاتبقى فاضية وفعلا كانت مشغولة جدا

قلت أكتب الطلب لنائب رئيس الجامعة فكتبته ووديته لمديرة مكتبه وقالت لى انها هاترسله لمدير المدينة قلتلها يعنى أجى أسأل امتى فلم تحدد موعد محدد فاستأذنت منها وخرجت

****

تحديث
ذهبت اليوم لنائب رئيس الجامعة وكالمعتاد فشلت فى مقابلته وقالت لى مديرة مكتبه إنها أرسلت طلبى إلى المدينة
قلتلها انا جاي من المدينة دلوقتى وقالوا لى أن مفيش حاجة جات
قالت لى يمكن الطلب لسة فى الطريق
فسكت وقلت فى نفسي بقى ورقة تقعد فى الطريق 24 ساعة والمسافة بين المكانيين لا تستغرق 7 دقائق
بعدها خرجت وذهبت إلى الكلية وطبعا العميدة كانت مشغولة بالمؤتمر
فكتبت طلب وتركته مع مدير مكتبها

****

المدينة الأن بها أماكن كثيرة خالية وهم الإن يسكنوا اللى شايلين مواد وانا تقديري جيدا جدا ، وحصلت فى التيرم الأول هذا العام رغم الظروف على تقدير عام جيد جدا أيضا بفضل الله
فهل حتى تكافئنى الجامعة على نجاحى بتسكينى الذي هوا أصلا حقى

No comments: