Wednesday, November 12, 2008

و...رد

لمدة ثلاثة أيام كانت فترة إنعقاد مؤتمر " ستون عام على الإعلان العالمي لحقوق الإنسان " في كلية سياسة وإقتصاد ، وكان أمس أخر يوم في أيام المؤتمر ، وكان بالأمس أيضا موعدي مع إدارة الجامعة ومع رئيس الجامعة بالتحديد لأستمع إلى الرد النهائي بشأن تسكينى في المدينة أم لا ، مش عارف ليه ربطت بين المؤتمر وموقف الجامعة معي
المهم
ذهبت إلى القبة فقابلنى حرسها الذين يقابلونى ويعاملوني بإحترام منذ إعتصامي ، فدخلوا على قائد الحرس وبعدها خرج أحدهم وأخذني معه إلى مكتب رئيس الجامعة ولكنه لم يكن موجود ، فقابلنى مدير مكتبه وقال لى
يا أحمد الدكتور حسام أشر على طلبك بس إنتظر يومين تلانة كدة وتابع مع نائبه الدكتور عادل زايد
قلتله : ليه أنتظر يومين تلاتة مش هوا أشر خلاص
قالى : معرفش بقى
قلتله إزاي أتعامل مع الدكتور عادل زايد نائبه وهوا قالى قبل كدة إن المدينة مش من حقك وإن إحنا مش هانسكنك إلا بعد شهر يناير
قالى : أصبر بس وطالما إن رئيس الجامعة أشر على طلبك يبقى ده معناه الموافقة بس أنت أصبر شوية
وقالى : أنا عايزك تهدى ومتعملش أي حاجة
قلتله : ما أنا هادي أهو هوا أنا عملت اى حاجة ، ما أنا منتظر أهو من ساعة ما عطتوني الوعد
قالى : ما أنا عارف إنك هادي دلوقتى بس بقول على بعد كدة
قلتله : ده متوقف على تسكينى أم لا
وقلتله أنى دلوقتى عندى إمتحانات ميد تيرم وإن الموضوع ده مأثر على مذاكرتي ، يعنى أنتوا تعاقبوني أنى جبت تقدير حلو السنة اللى فاتت بإنكم تبهدلوني السنة دي وبعد كدة تيجوا تطلبوا مننا التفوق وحب البلد والإنتماء ووو
وقلتله : قولى اليومين تلانة دول بالظبط إيه اللى هايحصل فيهم يعنى قولى على إجراء معين هايحصل وياخد وقت حتى عشان أكون مستريح
قالى : معرفش
سبتهم على إنى هاجي تاني بكرة يوم الخميس حتى أتأكد من الموافقة واحاول أقابل رئيس الجامعة تاني ونائبه وأعرف موقفهم بالظبط
وأدعولى يا جماعة إن إمتحانات الميد تيرم تعدى على خير

5 comments:

Anonymous said...

Rabena ma3ak

Anonymous said...

يا جماعة أحمد مش مجرد واحد عايز يسكن في المدينة ومش راضيين يسكنوه
أحمد رمز للصمود الوطني الذي يجب ان يكون
يكفي أنه يطالب بحقه بكل جرأة وأدب

محمد شوشة said...

قالها من نؤمن بان كلامه الحق
ان مع العسر يسرا
صدق الله العلى العظيم
اذا كنت بالله مستعصما
فماذا يضيرك كيد العبيد
احمد جاى من الفيوم
وبحمل بلاده مهموم
ولا همه سحب وغيوم
داالهمهتهد جبال
ارفع ياض راسك على
خليك ع الحق تملى
نشكر ربنا ونصلى
دا الحق يريد رجال

أحمد عتمان - Ahmed Etman said...

ربنا معاك يابو حميد

أحمد عتمان

أحمد عبد القوي said...

أستاذي : حسام خليل


ايه وصلات المدح دي ؟؟
ده كتير قوي ، انا لا رمز للصمود الو
طنى ولا حاجة لاني مضحتش بحاجة ... فدى أعتقد انها مبالغة
انا بس بطالب بحقى


شوشة المنوفي


ايه ده ؟؟

انت بتكتب شعر يالا ...
ان شاء الله هارفع راسي قريب في الكلية وفي البلد عندما أسكن
ربنا يوفقك


أحمد عتمان

أشكرك جداااااااااا على إهتمامك

ربنا ينصرنا جميعا