Tuesday, October 21, 2008

حقى ... ومش هاتنازل عنه



أحمد محمود عبد القوي من الفيوم الفرقة الثالثة كلية الإعلام صحافة جامعة القاهرة، حاصل على تقدير عام جيد جدا في الفرقة الاولى والثانية ، مثل كل زمايلى قدمت مدينة جامعية وسحبت الملف ومليته وقدمته وكله تمام ، وليس لى اى مخالفات أو انذارات سابقة والكل يشهد بهذا لي


المشهد الاول :

يا أحمد الإخطارات بتاعة المدينة الجامعية جات ، اطلع هاتها من رعاية الشباب
طلعت وأبحث فى الأسماء مش لاقى إسمي ... قالى الموظف هيا دي الاسماء اللى جات لي من المدينة... فهمت الجامعة ناوية تعمل معايا ايه السنة دي ، بس احسنت الظن برضه وقلت يمكن خطا روتينى ، ماكنتش فاضي لمدة أربع أيام بعد هذا اليوم وبعد كدة قلت أروح أسأل اسمي مش نازل في التسكين ليه



لمدة أربع أيام متواصلة أخذت الجامعة والمدينة والكلية شرقا وغربا وهما بيبهدلونى ومش راضيين يقولوا لي مش هاتسكن ليه ، كل واحد يبعتنى للتاني ما خلتش حد الا لما رحتله ... رحت لرئيس المدينة الجامعية بنين ورعاية الشباب وشئون الطلبة ومبنى الكمبيوتر بالمدينة ووكيل الكلية لشئون الطلاب ورئيس المدن الجامعية وعميدة كلية الإعلام ونائب رئيس الجامعة لشئون التعليم والطلاب



وبعد عناء طويل

قالها لى رئيس المدن الجامعية ... " انت المفروض كنت فهمت انت مسكنتش ليه
قلتله ليه ؟؟
قالى ... افهم براحتك
قلتله ايه ... مستبعدينى أمنيا
قالى : انا ماقلتش كدة بس انت افهمها لوحدك
قلتله خلاص ... هيا كدة وضحت وكدة انت ريحتنى عشان انا كنت فاكر ان السبب حاجة روتينية أو تشابه أسماء ولا حاجة
ومديرة مكتب نائب رئيس الجامعة الدكتور عادل زايد وتسمى مدام إيناس قالت لي .. انت شكلك ليك مشكلة مع الامن
قلتلها شكرا ... ومشيت



رئيس المدن الجامعية وأسمه الأستاذ سيد جنينة قالى ... احنا بقى مش هانسكنك واعمل اللى تعمله
قلتله خلاص شكرا يا سيد بيه وانا هحاول أسكن بطريقتى


المدينة الجامعية حقى حقى حقى ... أخد حقى ده أسكن فيه أسيبه أقفل الأوضه أعزل منها ... بس يكون برضاي أنا ،مش غصب عنى ،والله والله والله لن اتنازل عن حقى في السكن بالمدينة الجامعية طالما مستوفي كل الشروط ومش ليا أى إنذارات سابقة وحاصل على تقدير جيد جدا، ،
لماذا شردتوني ؟؟؟؟
فعلا هذي بلاد لم تعد كبلادي

1 comment:

عبد الزهراء المصري (علي الحسيني) said...

بسم الله الرحمن الرحيم
اللهم صلي على محمد وآل محمد وعجل فرجهم وألعن عدوهم

********************

أيه اللي بيحصل ده ؟؟؟
والله حرام اللي بيعملوه فينا بجد والله حرام !!!
وبعد كده يقولوا لنا الإنتماء ياولاد الأنتماء يابنات ... طيب هنتمي لبلد الأمن واكل شارب نايم وضارب شعبها فيها ليلاً ونهاراً سراً وجهراً ... بلا قرف

عالعموم ياأستاذ أحمد مظلوميتك مش هتبقى أبداً مكتومة لأنك مدون وأنا بعتبر مظلوميتك هي مظلومية لكل المدونين وإن شاء ربنا يرد لك حقك وأحنا كمدونين مش هنسكت على مظلومية صاحب حق ...


عبد الزهراء المصري
علي الحسيني