Sunday, April 20, 2008

حوار شنيع مع عمرو عبد السميع


في إطار إحتفالات جامعة القاهرة بالمئوية تستضيف كلية الاعلام أحد أخريجي الكلية وإبن من أبنائها الأفاضل وهو

القدوة عمرو عبد السميع


قرأت هذا الإعلان وقررت المشاركة


******


في الفترة الأخيرة زادت كلية الإعلام من إستضافة الإعلامي عمرو عبد السميع


مرة تحت مسمى القدوة ومرة حوار مفتوح مع الطلاب وأعتقد أن هذا يرجع إلى

صداقته بعميدة الكلية الدكتورة ليلى عبد المجيد


ولكن أتكلم بصفتي طالب بالكلية وأعيش داخل الوسط الطلابي أن الطلاب لا يقبلوه


المهم نرجع الى الندوة


بدأ الحوار المفتوح وأنا بجد كنت مشحون جدا منه


ورفعت يدي

وقبل إختياري قال جملة هامة جدا


أول مبادئ الحوار أن تستمع إلى الطرف الاخر


قلت قشطة جدا هوا إللى قالها بنفسه

.

وبدأت مداخلتي


عرفت نفسي

وقلت :حضرتك لسة قايل إن أول مبادئ الحوار أن تستمع إلى الطرف الاخر


والمتابع لبرنامج حضرتك يجد غير هذا


قالى : يعني البرنامج بتاعي مش عاجبك وأعتقد أنه كان ينتظر أن أقوله لأ البرنامج كويس

.

ولكن قولتله : أه طبعا مش عاجبني


قالى : ليه

قولتله : لإنك في البرنامج أحيانا تناقش قضايا تخص طرفين وتستضيف ضيوف يهجموا ولا تستضيف الطرف الاخر

قالى : قولى بالظبط زي إيه
.

قولتله : بالراحة هاقول أمال أنا واقف ليه

يعني حضرتك عندما تناقش قضايا تخص جماعة الإخوان المسلمين تستضيف ضيوف يهاجموهم ولا يحضر ممثل لهم

فكيف يعتبر هذا حوار وأنت قلت أن أول مبادئ الحوار أن تستمع إلى الطرف الاخر

.

طبعا هوا أسلوبه شديد قوي وكلامه أشد وحاول بأسلوبه أن يقاطعني ويشتتني

ولكني ماعرفش إزاى

.

رحت موجه صباع يدي تجاهه وقولتله : لو سمحت أخلص سؤالى وبعد كدة رد براحتك

حسيت إني أحرجته

وأكملت قائلا : وحضرتك تستضيف شخصيات معينة وثابتة فى برنامجك معروف أرائهم

قالى : زى مين

قولتله : زى الدكتور رفعت السعيد والاستاذ عبد الله كمال

وأنا كطالب وأعيش فى الوسط الطلابي وأحتك بهم أقول لك أن


هذه الشخصيات لا نقبلها ونوجه لك رسالة بأن لاتستضيفهم في برنامجك لإننا لا نحبهم


ونطلب منك أن تقدم مضمون يعجبنا وشخصيات نحبها

.

عميدة الكلية حست إن الضيف أحرج


قالتلى : لو سمحت إتكلم عن نفسك فقط


وهو قالى : مين إللى خلاك تتكلم بإسم كل الطلاب .


قلتلهم : أنا أعيش في الوسط الطلابي أعرف يحبون من ويكرهون من


المهم أكملت قائلا : نعرف أن هناك صحفا قومية فيمكن أيضا أن نسمى برامج أيضا بأنها قومية


وأعتقد أن برنامج سيادتك يدخل ضمن البرامج القومية

وقالى : خلصت كلامك ياعبد القوي ولا عندك حاجة تاني


قولتله : خلاص


قالى : يعني أتكلم أنا بقى



قولتله : تفضل


وبدأ يتكلم بأسلوبه إللى الكل عارفه ويحاول يبرأ نفسه ويمدح في برنامجه وفي شخصيته


وإتكلم على القانون إحترام القانون وشن هجوما شديدا على الإخوان المسلمين وأسلوبهم وعدم إحترامهم القانون


المهم قعد يتكلم كلام كتير قوي


وقعد يوجه لى أسئلة تستفزني وتحتاج لرد وعندما أتكلم يصدني قائلا


زي ما أنا تركتك تكلم براحتك سيبني زيك


وعمال يقولى ياعبد القوي يا عبد القوي


وخلص كلامه وسئلت ناس تانية وكل ما يجاوب سؤال يقولى خد بالك ياعبد القوي


وفهمت يا عبد القوي ولا لأ


وقعد يكرر في عبد القوي طول الحوار كتير جدا

المهم أنا حسيت إني قلت كل إل عندي وجبت كل اللى داخلى كله وقلت كفاية كدة قشطة قوي


وفي نهاية الحوار ختم كلمته قائلا


سؤالك يا عبد القوي عندما أتذكره يقشعر بدني


****

13 comments:

AHMED SAMIR said...

مية مية يا عبد القوي
باشا يا ابني والله
اديله ما ترحمهوش
تحياتي

karakib said...

انت الغلطان علي فكرة
لأنه كان من الافضل تقعد تتكلم مع واحد انت عارف انه بيتحاور
او حتي تقعد تقرا كتاب
لكن حضورك لندوة زي دي ... يبقي انت اللي بتضايق نفسك بنفسك

المستكشف/احمد محسن said...

جميل المشاركة
و شوية بشويه هتاخد الثقه و تعرف إزاى تتحاور مع الناس دى بطريقتهم
بس
براحة شوية عليهم
مش لازم كله ضرب
خلى فيه شوية شتيمة !!

Anonymous said...

ياابني انت من يومك كدة فاكر ان مهاجمة الاخرشطارة انامعاك انو ممكن يكون مش كويس ولكن انت بتعمل كدة عشان انت بتحب الشوووو ثم انك متعصب للاخوان بطريقة ملفتة للنظر وكانك عايز كل اللى حوليك يعرف انك اخوانى حتي حمدي صلاح بتاع غلم النفس وسلملي علي نعمات

مسلم said...

لا جامد يا عبد القوى والله جامد ربنا يزيدك ويبارك فيك
بس عجبتنى قوى لما شاورت بصباعك
مش بقولك جامد
اخوك مسلم
مدونة اضرب يا باشا
http://idrabpasha.blogspot.com/

dr. Ahmed Sakr said...

معذرة أخوى الحبيب النقد مش بيكون بالشكل ده أسلوبك ده هيخليه ميخليكش تتكلم تانى لو هو فى مكان وبعدين خلى النقد يكون بعيد عن الإخوان هو عمرو أساساً الناس مش بتطيقة وكمان عارفين أن مواضيعه هايفه بس برضه النقد لو كان بعيد عن الإخوان كان هيثرى الموضوع وهتلاقى الناس كلها معاك علشان معظمهم واخدين موقف من الإخوان وبعدين دول بتوع السلطة يا غالى يعنى هيعمل اللى يقوله عليه الباشا

Anonymous said...

والله انت جامد قوي يا عبدالقوي

هوكان ناقص بس تقوله لما قعد يقولك يا عبدالقوي كنت تقوله عبدالقوي دا يبقى ابويا اما انا اسمي احمد

بس والله انت جامد
من ساعة مؤتمر المحليات الي كان في الفيوم ومداخلتك فيه القويه يا عبدالقوي انا قلت الواد عبدالقوي دا باين عليه هيبقى قوي
واخد بالك يا عبد القوي
ولا اقول تاني ياعبد القوي

ربنا يوفقك ويكرمك يارب

وادي مترحموش

أحمد عمر يوسف said...

عفارم عليك ياحمد
اعبال لما تعمله كده قدام حسنى
وتترفع محاكمة عسكرية
هههههعهعهععهههه

بهذر يعم متكشرش كده
.
.
ايوه كده هما دول الرجاله

كريم said...

والله راجل ياعبد القوي
بس انت لسه معرفتش هو ليه كان بكرر اسمك كتير ياعبد القوي

عموما أما يحصل حاجه هبقي اترحم عليك ياعبد القوي

سمـــر مــاهر said...

دكتور ليلى اكيد كانت منبهره بيك يا عبد القوى
لو كانت طايله تقولك اخرج بره مش عاوزين ازعاج
كانت قالتها
اهم حاجه انك عبرت عن رأيك

M.M.Abdullah said...

جاااااااااااااااااامد

Anonymous said...

انا زيك ياأحمد مش عبد القوي كنت معاه في البرنامج يوم حلقة ثقافة الإنتماء وسألت سؤالين أحرجت الضيف والدكتور عمرو فقص السؤال الي اتحرج فيه وسؤال الضيف فضل عشان يبين انه جامد ومابيتحرجش وده لأني انتقدت اسلوبه علي الهوا وبصراحه كل الشباب في البرنامج موديلز ماعدا الي رايحين مع الضيف وهستني ردك 

Unknown said...

كلنا عبد القويييييييييي