Saturday, December 20, 2008

Can you speak Human Rights ???

هل تتحدث لغة حقوق الإنسان ؟؟؟
هذا عنوان الدورة التدريبية التى أنهيتها اليوم بفندق قاعود سبورتنج بالأسكندرية والتى إستمرت 5 أيام والتى عقدها مركز القاهرة لدراسات حقوق الإنسان
الدورة كانت رااااااااائعة ومفيدة جدا , مع إنى كنت مش متحمس للدورة خالص عشان كنت رايح لوحدى ومعرفش أى حد وسافرت لوحدى وكنت أتمنى قبول أى من زملائي معى بس لم يوفقوا ، بس الحمد لله تعرفت على كل المشاركين وكانت مواضيع الدورة ثرية بالمناقشات والمداخلات وورش العمل والألعاب
.
.
هل هناك تمييز دينى فى مصر ؟؟؟
انا عن نفسى بقول إنه مفيش تمييز من وجهة نظري وإن أنا على المستوى الشخصى أتعامل مع أى حد دون النظر إلى دينه أو أو أو
لى أصدقاء بهائيين وملحدين ومسيحين مصريين وأجانب ومن كل التيارات أتعامل مع الكل بمبدأ الإنسان ، أعشق كلمات محمد منير فى حدوتة مصرية " لايهمنى إسمك ولايهمنى عنوانك لايهمنى صوتك ولا ولادك ولامكانك ... يهمنى الإنسان ولو مالوش عنوان
.
بس لعبنا لعبة فى الدورة أثبتت عكس كدة خااااااااالص وكانت النتيجة صدمة لينا كلنا ، كان معى فى الدورة شباب وبنات كتير يعملوا فى منظمات حقوقية والمجتمع المدنى ومحاميين وصحفيين بس معرفش إزاي دول والمفروض إنهم من النخبة وتكون نتيجة اللعبة زى ما هاتشوفوا
.
.
تم إختيار 4 مننا وكان عددنا حوالى 25 وطلبوا مننا تصويت على شخص من الأربعة على أساس الكفاءة يمثلنا فى مؤتمر دولى ، تم الإختيار فحصلت بنت إسمها أسماء على أعلى الأصوات وبعدها أنور وبعدها إسماعيل وبعدها عصمت ، بعد كدة أعطوا للأربعة 4 ورقات تحمل 4 ديانات " مسلم - مسيحى - بهائي - يهودي " وحمل الأربعة الديانات الأربعة فأصبحت أسماء اللى حصلت على أعلى الأصوات فى التصويت الأول بهائية وعصمت اللى حصل على إقل الأصوات مسلم واسماعيل يهودى وأنور مسيحى ، وطلبوا إعادة التصويت مرة تانية وهم نفس الأشخاص
.
.
وكانت النتيجة
عصمت المسلم حصل على أعلى الأصوات وأسماء البهائية حصلت على أقل الأصوات ، يعنى تغيرت الأصوات بعد معرفة الديانات ، أنا لا أنكر إنى غيرت صوتى برضه بس بجد مش عارف إزاي ، يعنى بعد التصويت كنت فى حالة ذهول ليس منهم بل من نفسي أنا ، أنا تلقائيا وبدون تفكير غيرت صوتى وإخترت عصمت مع إنى ضد كدة ، فهل ده معناه إن إحنا فعلا عندنا تمييز دينى ؟؟؟
وإذا كانت اللعبة دى هى نموذج مصغر للمجتمع وإحنا المفروض إننا شريحة مثقفة وفاهمة وكانت دى النتيجة ، فإزاى هايكون حال الناس البسيطة اللى فى الشارع؟
.
.
هل إنتوا لو حصل معاكوا نفس الموقف كان هايكون إيه إختياركم
ولو طبقت اللعبة دى فى الواقع إيه برضه هايكون إختياركم ومبرراتكم؟؟؟؟
.

9 comments:

متمردة .. Rebellious said...

معلومات قيمة


شاكرة مشاركتك إيانا فيها



مدونة تحمل من القيمة الكثير الكثير



متمردة ،، Rebellious

أحمد عبد القوي said...

متمردة
أشكرك جدا على زيارتك مدونتى وعلى كلماتك ورأيك المحترم

جزيتى خيرا

Unknown said...

مممممممممم

للأسف مهما بنعتقد اننا مش بنميز بين النس ومهما حاولنا اننا نعمل ده لكن للأسف لسه في نوع من أنواع التميز

والموضوع مش دين بس

لو غيرت الدين وخلتها علي الاشخاص الاقرب ليك بردو التصويت هيتغير

مش عايزه اقولك انه لو حتي علي الشكل هيتغير

حسن أبو علي said...

واضح انك استفدت من الدورة يا أحمد ربنا ينفعك باللي تعلمته والله الموفق

أحمد عبد القوي said...

إسراء

طبعا لاوم يكون في تمييز واللى إحنا بنطلبه ده مطلب مثالى يصعب تطبيقه

بس على الاقل نحاول إنه ميكونش على طول

ونحكم عقلنا شوية

شكرا يا إسراء على مرورك

أحمد عبد القوي said...

حسن أبو على
سونة كباتشينو

مبروك المدونة يا سونة

ورنبا يوفقك يااااااااااااااااارب

Anonymous said...

تجربة جميلة والأجمل منها مواجهة النفس بعدها ومحاولة فهم ما جري. أنا بميل في تعاملي دائما مع المبدأ الإنساني وأقدمه علي التصنيف الديني لكن في الحقيقة أنا أعتقد أنني لو كنت مكانك كان ممكن أتصرف بنفس الأسلوب ليس لأني متعصب دينيا ولكن لأننا كشرقيين تتحكم فينا عواطنا أكثر من عقولنا. المسألة من وجهة نظري ليست تعصب ديني بقدر ما هي مجرد بحث عن رباط بينك وبين أحد المرشحين حتي تختاره...دعني أغير هذا المثال قليلا لأوضح وجهة نظري فلو فرضنا أن هؤلاء المرشحين كانوا من أسوان والمنصورة والسويس والفيوم وكان الفيومي مسيحي....أعتقد أنك كنت ستميل لاختياره لأنه بلدياتك
م.هشام محرم

أحمد عبد القوي said...

م/ هشام محرم

حضرتك أثرت نقطة هامة وهي هل نحن نختار بعقولنا أم بعواطفنا ؟

أعتقد ان لابد من الاثنين معا ولا يجب الفصل بينهم وانا أعرف ان ما أريده هو شئ من المثالية بس العقل والعاطفة إيه الللى بيطغى على الاخر ؟

بخصوص الاختار على أساس المحافظة والبلد ... أنا معاك فيه بس لانه برضه فى تمييز على أساس الاقليم مثل البدو كدة والصعايدة
بس واحنا فى الكورس الدين طغى على كدة واختاروا على اساس الدين مش المحافظة
يعنى الانتماء عندنا فى مرتبة أقل من الدين

يعنى اانا لو خيرتك بين حاكم مسلم غير مصري وحاكم مسيحي مصري هتختار ايه ؟

شكرا لزيارتك وإضافتك

Anonymous said...

إذا وصلنا لمنصب الحاكم هنا تكون المشكلة اكبر لأن الخوف ممكن يكون من تعصب الحاكم وليس المحكوم. بمعني إنه لو غير مصري ممكن ينحاز للأقلية التابع لها ونفس الشيء لو مسيحي...لذلك أتوقع إن اختياري في هذه الحالة سيكون علي أسس عقلانية صرفة إعتمادا علي مميزات كل مرشح
م.هشام محرم