Wednesday, December 31, 2008

الوزير الحقل والرئيس ال... ولا بلاش


للأسف شاهدت بالأمس خطاب الرئيس مبارك والذي اعلن فيه بكل صراحة بل بجاحة أن مصر لن تفتح معبر رفح إلا فى وجود السلطة
الفلسطينية والمراقبين الدوليين ، لم يستح ولم يهتم بالمطالب الشعبية والمظاهرات التى غطت مصر كلها ، قالها وهو يعلم أن السفارة المصرية أصبحت الأن مثل السفارة الإسرائيلية فى إستهدافها من المتظاهرين

سلم سلم ... شلت يداك إنت وهوا

ألا تعلم يا سيادة الرئيس أن السفارة المصرية فى اليمن تم إقتحامها وتكسير محتوياتها
ألا تعلم يا سيادة الرئيس إن متظاهرين سوريون تجمهروا أمام سفارتنا فى دمشق
ألا تعلم يا سيادة الرئيس أن طلبة إيرانيين تظاهروا ضدنا فى طهران
ألا تعلم يا سيادة الرئيس أن طلبة كويتيين تظاهروا ضدنا فى الكويت
ألا تعلم يا سيادة الرئيس أن متظاهرين لبنانيين حاولوا إقتحام سفارتنا في بيروت
إلا تعلم يا سيادة الرئيس إن لو في سفارة لمصر فى الفيوم كنت انا كمان تظاهرت ضد موقف مصر أمامها وضدك شخصيا

قول قول ياراجل ... ده إنت طلعت نكتة

طبختها مع ليفنى قبل الغارت على غزة بيومين ، كنت باعتلها ليه يا ريس ؟
قلتلها إيه وقالت لك إيه ؟
سمعت كلامك ولا لأ ؟
عبرتك ولا لأ ؟
يابن اللذين ... جامدة جامدة ، ده إنت طلعت روش طحن
وزير خارجيتك أحمد أبو الغائط سمعته بالأمس فى برنامج إتكلم مع لميس الحديدى يقول إن الرئيس مبارك رأى بحكمته ونظرته المبعدية أن إسرائيل لديها النية لضرب غزة فقال إبعتولى الست دى أحذرها من ضرب غزة
ها ... حذرت بقى يا ريس ... جزيت خيرا
فعلا تحذيرك جاب نتيجة ياريس ، الست والجيش كانوا ناويين يضربوا 40 مقرا أمنيا بس
ف ليفنى قالت لباراك : عشان خاطري يا باراك خليهم 39 أهو أبقى حتى عبرت مبارك ، ده الراجل بعت لى مخصوص ياراجل
قالها : أوك عشان خاطر عيونك يا ليفنى ، بس إوعى يكون الراجل ده بصلك كدة ولا كدة
قالت له : متخافش يا روكة ده أنا ليفنى والأجر على الله

حاسبي حاسبي ... السلم خلص

قالها : أمال الراجل أبو الغيط ده كان ماسك إيدك كدة ليه
قالت له : انا كنت نازلة انا وهوا من على السلم بتاع الوزارة فمعرفش أن الدرج بتاع السلم خلص فجيت أنزل كنت هاقع ، فالراجل طلع شهم وشجاع وأسندنى ، وانا أعتقد إنه ما صدق
قالها روكة : خلاص سامحتك يا فنة - بضم الفاء
ولا عزاء للشهداء

9 comments:

DomDam said...

و الله يا احمد الواحد بقاله أيام بيفكر في اللي ممكن يتعمل مع الكلب ده و قبيلته
أنا بقيت مقتنع إن مابقاش ينفع غير التغيير بالقوة
مفيش بديل لثورة الشعب
احنا مستنيين ايه اكتر من كده؟؟
الأوضاع بقت أسوأ ما يمكن على جميع الأصعدة، جوة و برة، و مابقاش فيه انحطاط ممكن نوصله أكتر من كده
انما الشعب لسة بدري عليه قوي، احنا اقصى حاجة بنعملها شوية مظاهرات يفضها الأمن و خلاص على كده.
المشكلة في ان الثورة محتاجة قيادات شعبية ذات درجة عالية جداً من القبول و الثقة الشعبية، و ده مش موجود، مفيش قيادات الشعب كله يقف وراها و يثق فيها و يمشي وراها
أقوى ناس على ساحة المعارضة و هما الاخوان معندهمش ناس على هذا القدر، أو عندهم بس سياستهم و منهجهم اللي انا شايفه مصيره الفشل في الوصول السلمي للسطة من أجل التغيير، مش بيخلي الشخصيات دي تظهر بالشكل الثوري المطلوب
و اذا الشعب انتفض و خلاص من غير ما يكون ماشي ورا قيادة معينة حتبقى فوضى مش ثورة و غالباً مش حتؤدي إلا لخراب
الغريب بقى قوي ان فيه مصريين بيدافعوا عن موقف مبارك و شايفين انه بيحافظ على مصر و حدودها و أمنها؟؟؟؟!!!!!!!
معقول فيه ناس وصلت للدرجة دي من انعدام الرؤية و العمى؟؟؟؟؟
و ناس تانية متضايقة قوي من الهجوم العربي الشعبي على النظام المصري و شايفة انه هجوم على مصر، مع ان نفس الناس دي كانت عمالة تقول ان مبارك لا يمثل مصر و عار عليها، طب متضايقين ليه بقى؟؟ و ليه شايفين دلوقتي ان كرامة مصر في كرامة مبارك؟؟
و بعدين احنا حنسيب القضية الرئيسية و الفلسطينيين اللي عمالين يموتوا و نقعد بقى نتكلم في اللي بيهاجموا الموقف المصري؟؟؟ لدرجة ان بعض الناس بدأت تقول ان دي حرب على مصر؟؟؟!!!!!!!!!
كرامة مصر أكبر بكتير من كرامة أي رئيس مر عليها و للأسف أكبر بكتير حتى من كرامة شعبها الحالي اللي حاله بقى يصعب على الكافر من مدي الضعف و قلة الحيلة و الجهل و قصر النظر

أخوك
أحمد عتمان

Anonymous said...

اية يا احمد الحلاوه دى بجد انا بحييك على اللى انت عملته فى الجامعة بعد قرار استبعادك من المدينة -انا يا عم احمد عزت زميلك فى الثانوية

احمد عزت محمد said...

ازيك يا احمد .انا كنت بتصفح على النت فجأة شفت مدونتك وعجبنى كل الكلام اللى كتبتة.بجد احنا فخورين بيك. زميلك فى ثانوى احمد عزت

أحمد عبد القوي said...

الاستاذ أحمد عتمان

كلامك وعباراتك كتيرة قى ومش عارف هارد على إيه ولا إيه
بس انا أؤيدك فى كل اللى قلته

بس انت شايف هل المصريين مؤهلين لثورة حقيقية وهل فى قيادة مممكن نلتف حولها

وهل سننسى الخلافات اللى بين الاحزاب

وهل سيستجيب النظام فعلا
والاخوان عددهم كبير بس مش منهجهم التغيير بالعتف ولا القوة لانها أثبتت فشلها تاريخيا

يبقى الحل لإما نصبر لإما نموت ونغور مش وشهم

وشكرا على كلامك وإضافاتك

أحمد عبد القوي said...

أحمد عزت

انت بقيت يا ولا بتقعد على النت أهو

شكرا ياض على الكلام الحلو ده

وعقبال ما تعمل مدونة ،

يابنى أنا اللى فخور بيكم ودفعتنا دي مستقبلها هايكون باهر مع إن حظها فى الثانوي مكانش حلو بس فى الحياة هايكونوا ناجحين

ربنا يوفقنا جميعا

بنت مسلمة مصرية said...

السلام عليكم
بالرغم من اني زائرة دائمة لمدونتك
ولكني لم اتب يوما تعليقا فيها بالرغم من اعجابي بها
وها انا اكتب
تدوينة رائعة
وكلام ساخروفاضح لهؤلاء العملاء
كنت دائما اقول انهم متصهينيين ولكن تأكدت انهم صهاينة
وانا اقرأ انتابني شعور غريب بالبكاء والضحك معا
لا ادري كيف ولكن هذا ماحدث
طريقة كتابتك رائعة جدا وساخرة مع محتوى قوي مؤثر
جزيت خيرا
ويارب انصر مجاهدينا ودمر اليهود واجعل غزة قبرا لهم
واخيرا كما قلت
ولا عزاء للشهداء

أحمد عبد القوي said...

بنت مسلمة مصرية

والله يا فندم أنا إزددت شرفا بزيارة سيادتك للمدونة وتعليقك فيها

وأشكرك جدا على رأيك الجميل ده

وجزيتى خيرا

jacker said...

Good Blog, I think I want to find me, I will tell my other friends, on all!
aoc power leveling

Anonymous said...

شاركونا في الحمله القومية للحجر علي الوزير الحقل

http://www.facebook.com/crocussa?ref=nf#/group.php?gid=53048073125&ref=nf

ضحك و لكنة ضحك كالبكا