Thursday, December 4, 2008

فترة نقاهة

كنت انتظر هذه الأيام بشغف ، نفسي في فترة نقاهة أجلس فيها مع أسرتى وأهلى وأصدقائي وألف في بلدتى أبحث بين المنازل عن من أعرفه فى هذا المنزل لأدخل أسلم عليه ، منذ أن دخلت هذه الكلية وانا علاقتى ببلدتى تأثرت ، فسفري المستمر وإنشغالى بالكلية والصحافة والجو العام بالقاهرة وحتى لما بأنزل بلدتى مش بقعد فيها ، بسافر للمحافظة وأرجع ليلا لأسافر صباحا
أسبوع أجازة العيد إن شاء الله هايكون توثيق للعلاقات
***********
أخيرا الحمد لله إمتحنت إمتحان الفينال فى كورس الإنجليزي بالجامعة الامريكية ، أنا على قدى لسة فى المستوى السابع وداخل على التامن ، كان مدة المستوى تلات شهور ، كانوا تقال علي قوي ، مش واخد أنا على الإلتزام أسبوعيا بموعدين كل موعد ساعة ونصف لمدة ثلاث شهور... المهم خلصت والمستويات الجاية هاخدها مكثفة أفضل
***********
بعض شباب 6 أبريل وبعض المدونين يتهموننى بأى مش متضامن مع محمد خيري ومحمد عادل حيث أتي متأخرا في الوقفات والإعتصامات وقال لى بعضهم " إبقى قابلنى لو وقفنا معاك فى حاجة تاني " , وأنا أرد عليهم بأنى والله لم أتاخرعن عمل أي شئ بس الفترة اللى فاتت دي كان عندى إمتحانات الميد تيرم فى الكلية ومحاضرات فى الجامعة الأمريكية قبل الإمتحان النهائي وللأسف مواعيد المحاضرات والإمتحانات كانت فى نفس موعد الوقفات ، وكنت أخلص الإمتحان وأجى جري بعدها للوقفة أو الاعتصام ، وعلى فكرة أنا مش بأحضر الفعاليات دي عشان حد وقف معي أو كتب عنى أو أو أو .... أنا بحضر الفعاليات دي من حوالى ثلاث سنوات وأنا بقف مع أى شخص صاحب حق أو سجين رأى
وياريت بلاش أسلوب إحنا وقفنا معاك إو إنت وقفت معانا ... إحنا مش بنتعامل بأسلوب رد الجميل ، دى مبادئ وأفكار
************
كل سنة وأنتوا طيبين بمناسبة عيد الأضحى ، ويااااارب يجعل أيامنا كلها أعياد وأفراح ، وأرجو أن لاننسى أهالينا في غزة وأن ندعو لهم فى صلاتنا ونتبرع لهم مثلا بجلد الأضحية أو مقابل مادي

15 comments:

Anonymous said...

كل سنه وانت طيب يااحمد عبد القوى ....وبس


لؤلؤ مكنون

الفارس النبيل said...

وانت طيب يا غالى

مصطفى محمود said...

تقبل الله منا ومنكم
وكل عام وانتم بخير
نسأل الله ان يعيد علينا الاعياد القادمة وقد تحررت مقدساتنا
لا تنسوا اخوانكم المحاصرين فى غزة من الدعاء

dalia said...

كل سنة وانت طيب فعلا صدقت فترة نقاهة جميلة جدا الواحد كان محتاج الاجازة ديه جدا ولا تأخذ باللك من حاجه المهم انك تكون مقتنع انك بتأدى واجبك
ومبروك النجاح وعقبال كل المواد والتخرج

Anonymous said...

السلام عليكم ورحمة الله
بمناسبة اللي بيحصل في غزة كل واحد-صغير أو كبير يطلع من عديته عشرة حنيه لفلسطين واللي يزود يبقي جزاه الله خير

Anonymous said...

انت لسة بتتكلم عن غزة
يا بني اللي بيتكلم عنها بيروح ورا الشمس
مش تاخد عبرة من اللي حصل لمحمد خيري ومحمد عادل
بص لمستقبلك
لما سألني الظابط قالي
يظهر خيبتك خيبة قوية
كان إيه دخلك بفلسطين
مالك بيهم رحت ف داهية

رابطة مدونى الفيوم said...

تتقدم
أسرة رابطة مدوني الفيوم
بأخلص التهاني القلبيه لكل
المدونين و المدونات
أعضاء الرابطة
بمناسبة عيد الأضحى المبارك
أعاده الله علينا وعليكم بالخير واليمن والبركات
كذلك تتقدم الرابطة بتهنئة خاصة
للمدون محمد خيري
في سجن وادي النطرون
و تتمنى الأفراج عنه في أسرع وقت

أحمد عبد القوي said...

لؤلؤ مكنون

كل سنة وانتى طيبة ... وعيد سعيد عليكي

وتقبل الله منا ومنك

أحمد عبد القوي said...

الفارس الغالى


انا فهمتها الأول إنك بترد على لؤلؤ مكنون ... إعذرني

بس فهمت إنك بترد عليا انا

كل عام وانت طيب ودمت

لاعيادنا بهجتها

عيد سعيد

أحمد عبد القوي said...

المتر مصطفى بك محمود

كل عام وانت طيب يا حبيبى

وتقبل الله منا ومنك

ويااااااااارب العيد القادم تكون مع اللى فى بالى

وطبعا إخواننا في غزة لن ننساهم ، ربنا يفك كربهم وينتقم ممكن ظلمهم

أحمد عبد القوي said...

أستاذتى العزيزة داليا العقاد

وأنتى طيبة ، الحمد لله يومين العيد إستثمرتهم أحسن إستثمار من ناحية العلاقات مع أهلى وأصدقائي

ربنا يديم أيامنا كلها أعياد وأفراح


الله يبارك فيكي ... وخلاص هيا سنة وأتخرج وهانبقى زملاء " زميلة يعنى "
ههههههههه

عيد سعيد

أحمد عبد القوي said...

دعاء فتحي

جزيتى خيرا يا فندم ...

أحمد عبد القوي said...

شاعرنا العظيم حسام خليل

اه هافضل هاتكلم عن غزة وعن فلسطين مهما حصل

ومش هنخاف

وربنا يفك كربهم وينتقم ممن ظلمهم



رابطة مدونى الفيوم

وانتم طيبين يا رابطة
وان شاء الله محمد خيري يخرج قريبا

امين

Abdullah Ramadan said...

كيف حالك يا أحمد ، أتمنى أن تكون بخير إن شاء الله، ووفقك الله دائما، سأضيف مدونتك إلى قائمة مدونات الأصدقاء في مدونتي ، وتقبل تحياتي

عبد الله رمضان

أحمد عبد القوي said...

دكتور عبد الله رمضان

أنا بخير الحمد لله ... كيف حالك حضرتك

انا سعيد جدااا بمرورك بمدونتى

كل عام وانت بخير

وتقبل الله منا ومنكم

تحياتى