قريت نوت أمال سامي " البر ادعي رئيسا " اللي كانت "تنتقد" فيها اللي بيطالبوا بتغيير الرئيس الحالي حسني مبارك، بدعوى إن ده مستقبل بلد مينفعش نجرب فيه، كنت عايز أرد على النوت في وقتها، بس كنت هاكتب كلام كتير وهاندخل في جدال أكتر، فقلت أرد عليها بنوت أوضح فيها تعليقي، وأهو برده نعمل زي الكتاب الكبار لما بيردوا على بعض بمقالاتبس إحنا هنرد ب " نوتس:D
أولا يا أخت أمال البرادعي أعلن عن فكره السياسي في كل لقاءاته الإعلامية، وأعتقد إن أي مواطن بسيط يقدر يفهم البرادعي عايز إيه وهايعمل إيه لو سمع أو قرأ حوار واحد ليه.أما البرنامج السياسي له كمرشح رئاسي 2011، فهو لم يعلن عنه أصلا ، وإنما أعلن عن مبادئ عامة وآرائه في النظام القائم وما وصل له الشعب من تدهور في التعليم وووو ولو عايزة تعرفي فكر البرادعي اللي قلتي إنه ما أعلنش عنه أصلا،وإن نفسك حد من أنصار البردعي يقولهولك أدعوكي لقراءة حواره مع جميل مطر من فيينا نشر في جريدة الشروق قبل ما يرجع مصر.
الجزء الأول
الجزء الثاني
الجزء الثالث
ثانيا يا أخت أمال مبدأ " التجربة " اللي قلتيه في النوت، وشبهتي تجربة تغيير رئيس مصر بتغيير جزمتك لـ" جزمة كعب"، أو إن تغيير الريس من باب التجديد " نيولوك"، أؤكد لك إنه مخالف تماما للي أنصار البرادعي عاوزينه، أنصار البرادعي يا أمال عايزين الدستور يتعدل ليسمح للبرادعي أو غيره إنه يرشح نفسه لرئاسة الجمهورية، عايزين تنافس حقيقي على الرئاسة مش شوية ديكورات بتوع الأحزاب، عايزين انتخابات مش مزورة، عايزين إشراف قضائي، عايزين إلغاء لقانون الطوارئ، عايزين رقابة دولية، عايزين فترة الرئاسة لا تزيد عن فترتين بـ 10 سنوات مش 30 سنة
هيا دي المطالب اللي عايزينها أنصار البرادعي وأدعوكي لقراءة بيان البرادعي " معا سنغير " واللي قال فيه مطالبه بإسم فئة عريضة من الشعب المصري
المطالب دي اللي عايزينها لو اتحققت وحصلت انتخابات نزيهة 100% جابت جمال مبارك والله العظيم لنقبله، جابت البرادعي ولله العظيم لنقبله، جابت حسني مبارك والله العظيم لنقبله، جابت البابا شنودة والله العظيم لنقبله، جابت الدكتورة ليلى عبد المجيد والله العظيم لنقبلهاالمهم يكون في فرصة أصلا لحد يترشح ونسيب الشعب هوا اللي يختار ويتحمل نتيجة إختياره
ثالثا يا أخت أمال إنتي سألتي إن البرادعي هل لو اليهود والأمريكان مكانوش موافقين عليه كان ظهر بالبساطة دي؟
البرادعي يا أمال طوال ال3 فترت اللي مسكها مديرا للوكالة الدولية للطاقة الذرية ولا أمريكا ولا مصر ولا إسرائيل كانوا بيدوله صوتهم في الانتخابات واللي كان بينجحوه هيا دول أسيا والشرق الأوسط وإفريقيا – على حد علمي – وموقف البرادعي من الحرب كان واضح جدا، وقال لأمريكا إن العراق مفيهاش أسحلة نوويةوأبلغ مجلس الأمن قبل غزو العراق بأسبوعين بأنه لم يجد أي أدلة تدعم مزاعم بوش بأن صدام حسين أحيا برنامج لأسلحة الدمار الشامل.
مش كدة وبس لا وأبلغ مجلس الأمن برده إن المعلومات اللي قدمتها أمريكا وبريطانيا عن إن صدام أحيا برنامج الأسلحة النووية اللي فككها مفتشو الأمم المتحدة في التسعينات، هذه المعلومات استندت إلى " وثائق زائفة"وكلنا عارفين إن أمريكا كانت هتحارب هتحارب، مكانتش مستنية يعني رأي البرادعي يوافق أو يرفض
ويعني العالم كله بما فيه العرب والمسلمين مقدروش يوقفوا أمريكا وبريطانيا عن الحرب، نيجي إحنا المصريين نلبسها للبرادعي ونقول إنه كان السبب في الحرب أعتقد إننا مش بالسذاجة دي وأدعوكي يا أمال إنك تبقى تقرأي مذكرات البرادعي اللي لسة هاتنشر عن دار نشر هنري هولت آندكوز متروبوليتان بوكس، واللي هايكشف فيها تفاصيل محادثات مع مسئولين أمريكيين سعوا إلى شن حرب العراق وقال البرادعي في المذكرات دي إنه " كافح بلا طائل لمنعها"، تقوليلي هاقرأ المذكرات إزاي لما لسة ماتنشرتش، هقولك لما تبقى تنزل مصر وتترجم إبقى إقريها :D
وأوافقك تماما في اللي قلتيه إنه لن تستقيم القمة حتى تنعدل القاعدة، وإن التغيير مش بيحصل بين يوم وليلة، بس برده مفيش ريس بيقعد 30 سنة
آمال
أرجو متزعليش مني دي كانت شوية خواطر استفزتني النوت بتاعتك إني أكتبها
كل التقدير والإحترام مني لك
1 comment:
أعتذر عن عدم التعليق في مدونتك في الفترة الأخيرة ولكن ليس معني هذا أني لم أكن أتابعها
أعجبني أسلوبك في الرد علي من يخالفونك في الرأي حتي ولو كانت آراؤهم تحوم حولها الشبهات!!علي كل دعنا من هذا ولنفكر الآن في دورنا في الفترة القادمة...علينا أن نواجه الحملات الدعائية التي تحاول بكل الطرق تشويه صورة البرادعي أو النيل منه بشكل أو بآخر.صحيح أن معظمها ساذج وعبيط إلي حد مضحك ولكنهم يعتمدون علي كثرة الإلحاح حتي يصبح هذا الساذج العبيط مقبولا لدي العامة
علينا أن نتفاعل مع الناس ..أن نجلس معهم ونناقشهم ونفند حجج الآخرين بهدوء وبدون تشنج...علينا أن نصل لكل البسطاء من ميكانيكي السيارات إلي عامل البناء إلي بائعة الفجل.....علينا دور كبير فهل نحن قادرون علي القيام به؟
م.هشام محرم
Post a Comment