الصحفيون ليسوا فقراء

الصحفيين ليسوا فقراء وعندنا يستطيعوا أن يحيوا حياة كريمة

ده مش كلامى ومش المقصود مصر ده كلام د. رونالد ميناردوس الإعلامي الألماني ومدير مؤسسة فريدريش ناومان الالمانية

:

كنت أحضر كورس لشباب الصحفيين تابع للمؤسسة وعندما قال د. رونالد هذا الكلام هاج وماج كل الصحفيين الموجودين فى القاعة والذينكانوا يمثلوا كل الصحف المصرية القومية والخاصة

فرد عليهم قائلا: أنا أعرف وضع الصحفيين فى مصر، فلم أمسك نفسي من الضحك

وأكمل رونالد : 50 % من الصحفيين الالمان راتبهم الشهري ما بين 1000 إلى 2000 يورو و 15 % راتبهم 3000 يورو والباقى 7000 يورو انا بقول شهريا مش طول العمر

ايه الاسلوب الجاف اللى كاتب بيه ده ... ما تدخل فى المهم يا عم عبد القوي

انت جاي تعقدنا وخلاص؟

حاااااااااااااااااااااااااضر

:

:

مفيش حد ينكر ان وضع الصحفيين المادي فى مصر مش ولابد، وكلنا عارفين ان مفيش صحفى يقدر يتزوج ويفتح بيت ويعيش من الصحافة بس، وان بعض الصحفيين يلجاوا للتلفزيون كمعدي برامج وللصحافة الالكترونية أو يعملوا فى مكاتب الصحف الخليجية فى القاهرة ، وللصحف الاسبوعية واللى بيضطروا يكتبوا فى الصحف التانية باسم غير اسمهم الحقيقى،

ونعرف نماذج صحفيين كتير من النوع ده

وطبعا السبب كارنيه النقابة

:

أتعجب وأسخر أحيانا عندما أعرف أن من أحلام وطموحات الصحفيين الشباب الان هوا دخولهم النقابة

أقوله : يعنى انت تروح اى جريدة حزبية أو تابعة للمجلس الاعلى للصحافة وتتمرمط من غير فلوس وكل ده عشان كارنيه النقابة

يقولى : ما انت أول ما تدخل النقابة بتاخد بدل وكام ياعم البدل ده ؟

570 جنيه ودلوقتى للنقابيين الجدد 190 جنيه

:

:

حكى لى أحدهم ان بعض الصحفيين زمان كانوا بيجيبوا لرئيس تحرير الجورنال الحزبي فطير مشلتت وبيض وطيور وسمن بلدي عشان يعينهم فى الجورنال وأول ما يدخلوا النقابة يتم فصلهم من الجورنال وطبعا كدة الصحفى استفاد بالبدل اللى بيستمر بعد فصله

يابن اللعيبة :D

:

احدهم قال انه اشتغل فى صحيفة ما لمدة 6 شهور بدون فلوس ولمدة 3 سنوات بمرتب 45 شهريا

وزميلة أعرفها قالت انها اشتغلت بعد التخرج من كلية الاعلام 3 شهور فى جريدة ما وفوجئت بمكافأة 95 جنيه بعد ال 3 شهورالغريب انها كانت فرحانة جداااا لان ده أول فلوس تاخدها من الصحافة

:

أعرف صحفى يعمل فى مدرسة خاصة الصبح وبعد الظهر بيشتغل فى الصحافة وماشاء الله يعمل فى جريدة يومية شهيرة من أكتر من سنتين ولم ياخد منها ولا مليم ويعمل فى جريدة اسبوعية بياخد منها 500 جنيه شهريا، وانا اللى كنت بقبض له ال 500 جنيه لإنى كنت بتدرب فى نفس الجورنال عشان الصحفى كان من الفيوم

ومرة وانا بقبض له لمحت فى كشف المرتبات أسمى وأمامه 200 جنيه، قعدت أدعك فى عينى وأركز فى الاسم اه ... هوا اسمى سألت

المحاسب: الاستاذ أحمد عبد القوي اللى مكتوب اسمه ده فى صفحة ايه ؟

قالى : الجامعة

قلتله : ده أنا... راح عطاني ال 200 جنيه وخلانى امضى أمام اسمى فى الكشف، و كانت اول فلوس أخدها من الصحافة وماشي أكلم نفسي ... معقولة فعلا فى فلوس فى الصحافة معقولة أخد فلوس وانا لسة فى سنة تانية قعدت أقول معقولة معقولة معقولة لحد ما الجورنال اتقفل وصاحبه اتحبس بتهمة استيلاء على الاراضي واختلاس، ولحد دلوقتى مش مطمن لل 200 جنيه حاسس انها فلوس حرام

ــــــــــــــــــــــــــــــــــــــــــــــــــــــــــــــــــ

الصحفى المبتدئ - تحت التمرين - فى كندا متوسط دخله السنوي 70 ألف دولار

عادي كدة :D

ـــــــــــــــــــــــــــــــــــــــــــــــــــــــــــــــ

سيناريو متداول وسط الصحفيين

1- الصحفى يعمل فى أى جريدة مرخصة اى مدة لحد ماياخد عضوية النقابة

2- يسافر الى دول الخليج حيث الصحافة الخليجية يلم شوية فلوس ويرجع مصر

يرجع تلاقيه فى احسن المناصب فى احسن الجرايد ، مثلا : رئيس قسم التحقيقات السابق بالمصري اليوم ( 5 سنين باالامارات - رئيس قسم الاخبار بجريدة الشروق 12 سنة بالامارات ، ومدير التحرير 12 سنة بالسعودية، أحمد المسلمانى 5 سنوات بقناة أبو ظبي وغيرهم الكثير

:

:

الصحفيين هم أكبر نموذج مسئ للصحفيين ... إزاي ده ياعم الكتكوت ؟؟؟

يعنى لما تلاقى الهدف الاسمى لصحفى أنه ياخد شنطة فى مؤتمر

ولا صحفى يتمنى انتهاء المؤتمر او الجلسة عشان يطير على ال Coffee Break

ولا صحفى يروح يغطى مؤتمر وييجى يسأل منسقى المؤتمر ينفع أخد شهادة انى حضرت :D:D:D

هاحكي معاكم - حلوة هاحكي دى - عن موقف

كنا فى مؤتمر دولى انا وبعض الشباب من الكلية

وكنا فى المركز الاعلامي للمؤتمر، يعنى التنسيق مع الصحفيين واستقبالهم والاتصال بهم وكدة يعنى، واتصرف على الصحفيين الالاف فى المؤتمر ده من واكل وشرب وشنط وبعضهم اقامة لمدة 4 أيام فى افخم الفنادق فى القاهرة يعنى من الاخر ... إتروقوا

المفروض ان لو صحفى محتاج حاجة يلجأ لينا فكانوا يلجأوا الينا لهذه الاسباب: صحفى فى جريدة محترمة يقولنا انا زعلان منكم نقوله ليه ؟ ... يطلع عشان مخدش شنطة

صحفى تاني جه ليا وعايز شنطة للمصور بتاعه، وصحفيين كتار ييجوا المؤتمر على الغدا، وتلاقى أكتر من صحفى ممثلا لنفس الجورنال

والفجيعة الكبرى... ان أمن الفندق مسك صحفى سارق علبة بلح محشي بالمكسرات من الوفد العمانى اللى فى المؤتمر ومسكوا الصحفى مخبى البلح فى الشنطة

واتعملوه محضر :D:D:D

:

:

حد يسألنى : يعنى من الاخر كدة انت عايز توصلنا ايه يا عم الفقيق

اللى عايز أقوله يا شباب ان الصحافة رسالة أولا قبل ما تبقى مصدر دخل ... تمارسها كمهنة وكرسالة هتلاقى الفلوس بعدين مننكرش أننا لازم نتمرمط ونتبهدل الاول وده الطبيعى ، والا مكانوش قالوا عليها مهنة البحث عن المتاعب والأهم فى كل ده

اننا نكون داخلين المجال عن حب

أيوووووووووووووون .... لازم تنشأ قصة حب طويلة بينك وبين الصحافة

قصة حب طويلة قوى ومتنتهيش بالزواج عشان بيقولوا الحب بيختفى بعد الزواج :D:D

وزي ما ذكرت نماذج توحى بالتشاؤوم، فى نماذج كتيرة جدا ناجحة مهنيا وأخلاقيا وماديا، وأكيد كل واحد منا عارف كتير من النماذج دي

بس دي كانت شوية خواطر جات دفى دماغى كدة، عارف انى طولت واسلوبي سخيف وان محدش هيقرا البوست كله

سلام