أخيرا .......... عملت مدونة

ياااه .... أخيرا عملت مدونة

بجد ياجماعة انا عملت مدونة , والله العظيم انا عملت مدونة

والكعبة الشريفة عملت مدونة, لأ وإيه أنا اللى عملتها بنفسي

يا جماعة مش هاتصدقوا اني من اكثر من خمس شهور بحاول اعمل مدونة ومش عارف

ادخل على النت والمواقع وادور وابحث وبرضه مش عارف

الى ان وجدت الطريقة على احدى المدونات وهي بعنوان - كيف تعمل مدونة على البلوجر

- فرحت جدا وقلت خلاص هاعمل المدونة وجلست حينها اكثر من خمس ساعات على النت

احاول اعملها وبرضه مش عارف

قلت خلاص سيبك من الاعتماد على نفسك وحاول تستعين بزملائك من المدونين

بصراحة كلهم نفضوا لى وكبروا لى .. لدرجة انى كنت اتى من الفيوم مخصوص حتى ابيت مع احدهم في منزله

في القاهرة واحاول اعرف منه كيف اعمل المدونة او يعمل لى هو مدونة ولكن كل محاولتي باءت بالفشل

قلت خلاص ربنا لا يريد لي ان اصبح من اللي بيقولوا عليهم مدونين

او ان لجنة شؤون المدونين رفضت طلبي لعمل المدونة لعدم اكتفاء الشروط

وبالفعل انتظرت اكثر من شهر بدون ادنى محاولة الى ان جاءني الخبر السعيد بقبولي

في دورة شباب الاحزاب المصرية بمركز القاهرة لحقوق الانسان

وكان معي شباب من كل الاحزاب والتيارات السياسية وكان معظمهم عندهم مدونات مثل

( مستنية الفرج - هاعيش واتحدى احزاني - انا كدة - مللت الصمت - انا بحبك يامصر )

وكانوا يتكلمون عن مدوناتهم كثيرا وانا وسطهم اتفرج عليهم واقول ياريت عندي مدونات زيهم

وخرجت من الدورة التي استمرات 8 ايام مصمم اني لازم اعمل مدونة بأي طريقة حتى لو اضطررت للجوء الى الطرق

غير الشرعية

وبالفعل جلست على النت اكثر من اربعة ساعات متواصله خرجت منها

بصفحة على النت عليها اسمي واسم المدونة , قلت الحمد لله

وبعد كدة سألت ازاي اكتب التدوينة وازاي اضع صورة ومعلومات عن نفسي وعرفتها

وجاءت المشكلة الكبرى وهي هاكتب ايه في اول تدوينة

وفكرت الى ان اهتديت الى تجربتي الشاقة مع عمل هذه المدونة

وبذلك اصبح من حقى ان يطلق علي لقب مدون يعني المدون احمد عبد القوي راح

والمدون احمد عبد القوي جه

وانضم بكل شجاعة لكل تجمعات المدونين

وفي النهاية اتمنى ان تسعدكم هذه المدونة وتفيدكم وان نجعل من المدونات عموما منبرا لمحاربة الفساد والطغيان

ولنعمل على اخراج مصر من مستنقع الفساد والديكتاتورية

ونجعلها مصر الحرية والعدل والمساواة وليكن شعارنا

مدونون ضد الفساد