Friday, October 31, 2008

ومن قال لك أن سكنك حق ؟

ذهبت لمقابلة نائب رئيس الجامعة أمس وتمكنت من مقابلته بسهولة ومدير المدينة لجامعية يطلبنى لمقابلته في مكتبه
وانه يبحث عني من فترة ، المهم دخلت على نائب ئيس الجامعة الدكتور عادل زايد
.
قالى : أنا طبعا عارف مشكلتك وقريت عنك فى الصحف ، ايه اللى إنت عملته ده ؟
قلتله : جربت كل الطرق الروتينية لمدة 8 أيام ولم أتمكن من السكن وحاولت أقابل حضرتك ؟أكثر من مرة ومعرفتش ، فقلت أستخد وسيلة ضغط ، فعملت اعتصام أمام كليتى ورفعت قضية
قالى : رفعتها على مين
قلتله على وزير التعليم العالى ورئيس الجامعة وحضرتك ومدير المدن الجامعية
قالي : طيب خلينا بقى ننتظر لحد ما المحكمة تحكم
قلتله : فترة التقاضي طويلة وأنا مش هانتظر لحد ما اخذ الحكم ... كدة هايحكم لى بعد التخرج
قالى : لما انت معاك فلوس كدة ان توكل سبع محامين ما كنت تسكن برة
قلتله : لا ، دى منظمات حقوق الإنسان هيا اللى متكفلة بكل المصاريف
قالى : وايه هدفهم
قلتله : انهم بيحاولوا يناصروا المظلومين والمهدور حقوقهم
قالى : دول هدفهم تشويه سمعة مصر والتفاخر أمام الغرب بأنهم يدافعوا عن حقوق الإنسان
.
.
المهم .........
قالى ومن قالك إن السكن في المدينة حقك ؟
إنت من حقك التعليم فقط
قلتله : أمال أنتوا عاملين المدينة ليه ؟ ... عشان اللى طلبة يسكنوا بالوسايط وناس عايدة السنة وأنا جيد جد مسكنتش
قالى : احنا بقى بتوع وسايط
.
.
قالى : انت استفدت إيه من اللى انت عملته ده ؟
قلتله : وسيلة ضغط وعشان تسمعوا صوتي ، أنا قعدت 8 أيام أحاول ومحدش عبرني وحاولت أقابلك أكثر من مرة ومعرفتش ، إنما دلوقتى حضرتك قاعد معايا فى مكتبك وبتكلمنى وموقفى أقوى من الاول ، ونفس الموقف مع العميدة ومدير المدن الجامعية
.
.
قالى : إنت حطيتنا في موقف صعب
قلتله : انتوا اللى حطيتوا نفسكم فى الموقف ده
قالى : انت متعرفش انك ممكن تتحول للتحقيق بسبب الاعتصام ده ؟
قلتله : لو أذنبت حولوني للتحقيق ولو خالفت اللوائح عاقبوني وهاكون راضي عنت العقاب لاني خالفت القوانين
قلتله : يا دكتور أنا كل اللى عملته أن طالبت بحقى وأنتوا أساتذتنا وعلمتونا إن أحنا مش نتننازل عن حقنا ، ازاي تيجوا تحاسبوني على حاجة انتوا علمتوهالنا ، وده حقى وأنا مستوفي كل شروط الإقامة
إزاي يكون زميلى من نفس الطبقة الإجتماعية ونفس التقدير ونفس الفرقة ونفس المحافظة يسكن وأنا ما أسكنش ، مش ده يعتبر تمييز يا دكتور
وأنا اللى عملتوا كله أنى كنت بقول رأيي في اللقاءات مع الحكومييين في كليتى وعندى مدونة بكتب فيها مواقف شخصية وبدون فيها طرائف وصور ومواضيع عادية
.
.
المهم : قالى في النهاية لو عايز تسكن انتظر لشهر يناير
قلتله : يااااااااه ، طيب وأنا هاقعد فين الشهرين دول
قالى : مش مشكلتى
قلتله خلاص : إدينى 30 جنيه كل يوم مصاريف سفري من الفيوم للقاهرة أو وفروا لى سكن بديل عن المدينة وأنا أوافق
قالى : مش مشكلتى برضه
قلتله : ده أخر رد عندك
قالى اه ... وخلى القضية تنفعك
.
.
قلتله: خلاص انتظر منى أي تصعيد وإني مش هاسكت
وأنا كنت قبل ما أدخل له بدقائق كنت في مداخلة قناة الحوار من لندن لبرنامج حقوق الناس ، طلبوني لمناقشة الإنتهاكات التي تعرض لها المدونين مؤخرا مثل الإعتقال والمطاردة والإستبعاد من المدينة الجامعية ، فقلتله أنا حتى لسة قافل مع قناة الحوار
قالى : إن شاالله تقفل مع الأوربت
.
.
قررت الأتى
.
.
سأبدأ اعتصام أمام مبنى إدارة الجامعة " القبة " يوم الثلاثاء الساعة 12 ، فمشكلتى أصبحت أكبر من العميدة وأكبرمن مدير عام المدن الجامعية وأكبر من نائب رئيس الجامعة ، والقرار ليس بأيديهم ولا أعرف من بالظبط الذي يدير شئون الجامعة؟؟؟
.

8 comments:

Anonymous said...

ربنا معاك وشد حيلك يا احمد

يمكرون ويمكر الله والله خير الماكرين

اختك - شهد

Anonymous said...

اخى / احمد

باسم اتحاد المدونين المصريين

ندعم موقفك الصلب فى المطالبه بحقك وعدم

التنازل عنه ونحن معك بكل ما نستطيع

وان شاء الله سوف يعود هذا الحق

اليك ونهيب بالقيادات الجامعية البعد
عن الكيل بمكيالين ورفض التدخل فى شؤنها
من جهات خارجية ( الشرطة )وليكن

قراركم نابع من مسؤليكم امام الله فى

خدمة مصرنا الحبيبه عن طريق تعليم

ابناؤها المبادئ والمثل والقيم واخيرا

القدوة الحسنه و العلم ......

مخبر قمل دولة said...

لا ياراجل مالكش حق تشوه صورة مصر بلدك كده
يقولو علينا ايه الخواجات يعني ؟!
مجاش ف بالك انك كده ممكن ترسم عندهم صورة لأن مفيش عندنا حرية رأي
وتبقى شاركت - ولو بشكل غير مقصود - في رسم صورة مغلوطة لمسيرة الديمقراطية ف مصر

انما لما الظابط يدي المواطن على قفاه في الرايحة والجاية .. بسبب ومن غير سبب .. مش بيشوه الصورة ولا حاجة

واما ظابط يدخل العصاية فـ .... المواطن .. مش بيشوه برضه

واما الانتخابات تتزور مش بيشوهو برضه

واما يعتقلو المعارضين مش بيشوهو برضه

احنا المفروض يكون قفانا اوسع .... احم صبرنا اوسع من كده ونتحمل عشان خاطر سمعة مصر .. ولا انت شايف ايه ؟

م/ الحسيني لزومي said...

شارك ف الحملة الشعبية للقيد بالجداول الانتخابية وادعو غيرك
ضع بنر الحملة علي مدونك والبنر موجود علي مدونتي

حسام خليل said...

يارب كتر رجالة مصر اللي ما بيخافوش غير من ربنا
يا أحمد يا عبد القوي
احفظ الله يحفظك احفظ الله تجده تجاهك واعلم أن الأمة........

فلسطينية الهوى said...

أنا قرأت كل البوستات السابقة

وآسفة اني اتاخرت في قراءتهم

عجبني اوي ردك عليهم

وموقفك جميل في ثباتك واصرارك

ربنا يعينك يااحمد ويجعل كل ما تلاقيه في ميزان حسناتك

لابد من التضحية :)

والتضحية تحتاج رجال

يارب تكون منهم

Anonymous said...

منصور بإذن الله
ربنا يثبتك

أحمد عبد القوي said...

منصور بإذن الله